حبـك علـى رملـة خفوقـي مواطيـه @@ورياح عذلي عنـك مـا تمسـح خطـاه

قلب يحبك والهواء الذرب ماليه
كانك مكذبني بعينك تحلاه

شرط ان تشوفك فيه ما انت بحواليه
ويمكن تشوف ديار واماكن رعاه

وتشوف به تمثال والوقت هاريه
وبتشوف زرع ن ميت وواقف ن ماه

وبتشوف جرح فيه سكين راعيه
راح ونسى السكين والجرح ينخاه

وبتشوف حصن عج الاقدار سافيه
وبتشوف باقي بيت راعيه خلاه

لا تنزعج هذا خفوقي وباقيه
ولا تضايق من تصدع زويــــاه

قد زلزله فرقا وهزت عراويه
والله ستر والحظ عانه وعافاه

وكانه صلح لك واعجبك زيد تبنيه
ابنه وجهز للمقابيل مبنـــــاه

ابيك بس من المفارق اداريه
وازهل من يداري شعورك ويدراه

وحلل وحرم فيه يا ابرك بلاويه
وحله وراع ارضاي وارضاك وارضاه

جعلك بعد بعض الوجيه امحق اوجيه
ناس مراتعها الرفيق بتقفاه

انواع واخطر نوع ماني بناسيه
نوع ن على تفريق الأثنين مسعاه

تلقاه دوم وكل يوم ن تلاقيه
وأليا بغيته صدق ماعاد تلقاه

والا انت ردك كل ما ادعيك لبيه
انا اشهد ان ما انتوا بعيني اشباه

ما انت بمع العالم ولاتقولي ليه
انت ادرى مني وش جوابي وفحواه

كذيه ومن الله يازين واليـــــــه
واغلا طروش القلب وادواه من داه

الحلم ياتيني بزولك واراعيه
وفي كل حلم اقوم قبل اتحفاه

واعشق سميك بالبزارين وادعيه
واقبل خطاه اليا اخطاء واتلقاه

واسمك يروعني أليا مر طاريه
واحب ملقوف ن يسولف وطراه

ما امر بيتك من بعيد ولا اجيه
وانا لو ان في يدي ما اتعداه

حتى تواير موتري تلتفت فيه
تبغي تلف ويستحي العقل والجاه

وصلك خيط الصدر والبعد يفريه
ويا بري حالي كان صديت برياه

ويلي على ادري حبنا ويش تاليه
ويلي على ادري وش ورا الغيب ويلاه